امي والصدامه العطافيه؛

السلام عليكم ورحمه الله وبركأإته
الحادثه بسم الله عليكم شلون نعلم اميــمتي ان ابوي يبي يعرس < جلست اصيح لين قلت بس

المكان: السياره ننتظر امي تركب بنرجع الرياض

اللحين شلون نقولها ..!! والله مشكله ..!! أخاف تيجها صدمه عاطفيه ..!! ولا شد عضلي بشعرها .!! يعععع أخاف تموت علينا .!!! ياربيييي قولو شي ..!!
شليويح: أنا أقول نقولها أن أبوي اليوم بيعرس عليها دامنا بالديره ..عشان لو جاها شي ولاشي تروح عن أم سليم تكويها مع علباها ولاشي
أنا : لا لا ..أخاف نقولها هنا بعدين (تطمح) وتعيي ترجع معنا الرياض وتقول خلوني عند أهلي ..بعدين حنا نتفكك أسريآ ونصير نعاني من حنان الامومه
شليويح وهو يطالعني بنص عين: أوووخص ياحنان الامومه ..أقول على طاري الحنان ترا أسم زوجة أبوي اللي بعرس عليها اليوم حنان
عمشه تنبرش علينا: حنان بعد ..مالت عليها عجوز قريح أم السعف والليف الفاصخه الماصخه خطافت الرجاجيل
أنا: اللحين كل هذا وأنتي مابعد شفتيها أقول هدو الوضع وخلونا نعلم امي بالحقيقه وحنا راجعين بالطريق ..

تركب أمي السياره ..حلفت عليها أن تركب قدام ..وانا جنبها مشتعبط بالدرقسون ..شلويح ورا بجانبه عمشه وبيننا زمزمية شاهي وقهوه وتمر من مزرعة خالي فهد .. انطلقنا نشق الطريق للرياض ..وكلنا في باله شي واحد (شلون نصارح امي بعرس أبوي )

انا: عمشه شغلي البلوتوث برسل ملاحظات لاتسمعنا أمي ..شرايك تقولين لـ أمي أنتي بنت ويمكن تقبل الموضوع منك
عمشه وهي مطيره عيونها: لا لا لا للوووش لا ... أنا أبعرس وأخاف اذا قلت لمي يطيح حظي وما أعرس ويفوتني قطار الزواج
أنا: قطار الزواج اجل ..انتي فايتك القطار من زمااان والمسافر راااح رااااح
فجأه أمي تلفت علينا: وشفيكم تساسرون ..بعدين والله ياعيالي أني مستغربه بالعاده محدن منكم يرجعني..دايم أخلي أحدا خوالكم يجيبني للرياض ..أول مره كلكم ترجعوني من الديره ..طلعنا كننا بعثة المنتخب وهي راجعه من كاس العالم
شليويح: أيه صح كننا بعثة المنتخب..بس المنتخب أكل ثمانيه ..حنا أكلين منكح ولاندري شلون نقولك
أمي تتفل وتعوذ من بليس: افا وش بكم ياعيالي وش اللي تبون تقولنه لي وخايفين..
أنا: ولاشي يا ام صنت لبا قلبك ياشيخه..شلويح وقف وقف عند اقرب صيدليه خل نجيب دوا ضغط وسكر وقولون وامساك وكل شي ..وبعدها نعلم امي السالفه..
أمي : هوووو ..أنا مابي لاضغط ولاشي ..قولولي يا عيالي ترا بديت أخاف وقلبي يرقص خليجي من الروعه
شلويح متحمس : يمه يمه أبوي أعرس عليك واليوم زواجه
(طنطووون طفشطح)>>>موسيقا مسلسلات اذا سمعو خبر مهوب زين

امي : عملها ابن الائيييه>>من هول الخبر ضربت فيوزاتها وقلبت مصريه
أنا : يمه ماعليك منه من زينه عاد ..خليه يعرس ويفك عنك هو الخسران اصلن..
عمشه تصيح : لا لا يمه ..أكيد أبوي بيقلب علينا اللحين ..والسوسه زوجته بتلعب براسه..وبيطردنا وبنصير نسوي أكل ونبيعه للناس مثل (سعاد عبدالله) بمسلسل أم البنات
شليويح : عمشه أنطمي هذا وقتك ..بدل ماتواسين أمي تقولين لـ أمي هالكلام..أنتي مالعبتس الا هالمسلسلات بس خلينا نرجع الرياض والله لـ كسر الرسيفر على راسك..
أمي :اللحين أبوكم اخرتها يعرس علي ..أنا اللي يوم يجي يخطبني اخذ رقم من زود الزحمه والخطاب اللي يبوني وأخرته يسوب تسذا
أنا : يايمه لا تكدرين خاطرك ..ترا هاللي اخذه بزر ماتسوى ..انتي ام العيال واكيد مهوب ناسيك..بعدين عادي شوفي نواف العابد بزرن ماطلع الا امس وهبل في أحمد الدوخي وجابه الجريه...عادي تقبلي الموضوع ولا تزعلين نفسك

امي وهي تشاهق:خلااااااص أسكتو ياعيالي قلبي بيوقف

شليويح:يمه ممنوع الوقوف بالخط السريع ..أصبري لين ناصل المحطه وخليه يوقف


وصلنا الرياض بعد ما تجاوزت أمي هول الصدمه وقدرت تنفس بشكل طبيعي وسكتت عمشه ونشفت دموعها بغدفتها ..وصلنا البيت ..نزلت أمي تتبعها عمشه وأنا وراهم ..دخلنا وهالنا ما رأيناه
أبوي وزوجته الجديده قاعدين بالصاله يشربون عصير ..والموقف الاذهل كان شكل زوجة أبوي
أنا لاشعوريآ: ياويلاه ويلاه يايبه وش ذي مشاعل الزنكوي
أبوي: شفت شلون نعرف نختار يا ورع
عمشه: وععععع وش هالمصاخه شوفو شعرها مزيت وجفونها تركيبه وجهها كله مجمع على بعض
كنه كامش
أمي تغورقت عيونها بالدموع وقالت: وش حيث حقين الاستديو يقولون أبيات وأنا لا ..وبدت تهوجن(يعني تقول قصيده)

يابو صنت الله ياخذ هالكشره
هانت عليك السنين والعشره
ورحت تدور صابغات الكشه
اللي همن المكياج والفرشه
ونسيت أم العيال السنعه
ونسيت صبرها على أيامك الغبره>>طراه جو الرياض غبار

بعد ماقلت أمي هالبيتين عطاه أبوي نظره ومسك يد حرمته وطلع للغرفه فوق ..أمي ماقدرت تقاوم الموقف وطاحت مغمي عليها ..على طول عمشه لقطت التلفون وقالت: أدق على ثلاث سبعات
أنا: أي ثلاث سبعات المسلسلات مهجولت بك هجوله تعالي شيلي أمي وخل نوديها للسياره ..

طلعت وشغلت البيوك 88 وسيدا على أقرب مستشفى ..
ويوم وصلنا المستشفى طبعاً كالعاده مالقيت مكان للبيوك دخلت مواقف الاسعافات ووقفت جنب سيارت اسعاف بالريوس وكتبت ورقه على القزازه ترا اسعاف ســري
وذبيت امي بالعربيه وطربت بها
أنا: لو سمحت أبي دكتور اللحين بسرعه
موظف الاستقبال: تبيه بكتشب ولا بدون
أنا: انا من شفت سكسوتك ذي اللي كنها قارب أبو شراع وانا غاسل يدي ..أقول معي أمي تعبانه وبدخل على الدكتور بسرعه
موظف الاستقبال: فيه عندنا دكتور يمني ممتاز جدآ
أنا: ياخوي تراني منيب جاي أغير زيت
موظف الاستقبال: للأسف مافيه الا هو
أنا: يله نروح له وأمري لله ..

أخذت أمي ودخلنا على الدكتور وأنا كلي حقد على زوجة أبوي ..أجل من أول ليله سوت بأمي تسذا أجل وشلون باقي الايام ..قطع هواجي الدكتور وقال: الوالده تمشي مع خريص الصبح؟؟
أنا : لا
الدكتور : طيب تشجع النصر ؟؟
أنا: لا ..بس ليش يادكتور هالاسئله
الدكتور وهو يفك جهاز الضغط عن أمي : لا بس ضغط الوالده مرتفع مرره مرره وأحتمال ينفجر ويسبب عمل ارهابي
أنا: ايه لا تلومها أبوي معرسن عليها
الدكتور: ليش ماقلت لي من أول عشان مااتعب عمري ..المشكله بسيطه خذ هالادويه والوعد بكره عند قسم امراض القلب

طلعنا من المستشفي وفي بالي فكره وجده وهي (الانتقام من مرة أبوي) دقيت على شليويح اللي كان بالاستراحه تو مولع راس الشيشه ..قلت له أنطل اللي وبل خشمك ولاينشف الا عندي ابيك بموضوع ضروي..وصلنا البيت وأجتمعت أنا مع شليويح وعمشه ..فاتحتهم بموضوع الانتقام ..وقلت نبي خطط مدروسه نقدر ننحش هالمسعده من بيتنا ..أتفقنا أننا نفكر ونفكر لين نحس أننا بنلحس ونشم باتيكس من قوة التفكير

قمت من بكره الصبح ..طلعت فوق السطح بدخن وتفاجأت أن أبوي مستحل الغرفه اللي بالسطح وخليها له ولحرمته الجديده ..قفلت معي ..هالغرفه هي كانت أحلامي الورديه وطموحي بالحياه ..كان أبوي واعدني يخليها لي اذا اعرست ...وكنت كل مانزل الراتب اشتري لمبتين ودولاب واحطها بالغرفه واجهزها لين اجي ابعرس ..قبعت زجاره كلها حقد على مرة أبوي اللي سرقت مني غرفه كانت في عيني أحسن من قصور العويضه< ماكل مايقول الشاعر صحيح ترا مادخن
طلع أبوي من الغرفه وهو لابس روب وسره اللي كنه جحر ضب باين من ورا الروب
قلت له باستهتار: روب وحركات منب عاقل يا حسين فهمي ..سقا الله ايام اول يومك تلبس سروال سنه لونه أصفر ولو يعضه قطو مات من زود الوصخ والجراثيم اللي فيه
أبوي وهو يضحك: أقول ياوليدي تعرف الاغنيه اللي تقول (واللي مايطول العنب خامضن عنه يقول)
أنا: اييه اييه أعرفها ..أعرف بعد الحبوب اللي مخليتك كنك شاب عشريني ..دواك عندي يا شايب الغفله...
شوي الا تطلع زوجته لابسه برمودا حمرا مطلعه كراعينها اللي كنهم نجفات من زود البياض ..بغيت اهايط عليها ..بس ماش من زود الجمال اللي فيها بلمت وقعدت اسعبل وماسويت شي ..
يوم شفت غرفتهم مابها أحد ..وانا اللي ادخل الغرفه وألقا حبوب(بانوراما مدري فياغرا) جنب السرير ..أخذت الحبوب وزبنت ..وقلت في نفسي(نشوف وش بتسوي الليله مع المزه اللي عندك يايبه)..
يوم جا بالليل ..الا أبوي يدق علي ..مارديت عليه ..شوي الا يدق مره ثانيه
أنا: هلا بالعريس الاطخم
أبوي: أحترم نفسك ياولد تراني أبوك يالزلابه ..ورح للصيدليه جب لي حبوب (%^%^%$)
أنا: أفا يا يبه أثرك طلعت ماش
أبوي: أقول أسمع الكلام الاثول لا أجيك أخليك تقول للعنز يا خاله
أنا: خلاص خلاص هد اعصابك مالها داعي تفلت عند ست الحسن والجمال ..ربع ساعه والحبوب عندك ..

شغلت البيوك 88 وعلى الصيدليه اللي جنب بيتنا ..دخلت الصيدليه وقلت للي يبيع عطني حبوب حقت سهال ..بطني يوجعني وبنزل كل اللي فيه
اللي يبيع في الصيدليه: خد بالك يا صنت الحبوب دي مفعولها أوي وخطيره..
أنا: ماعليك ياحسنين أصلن انا بالها وانا بالحمام من زود الحرص..

أخذت الحبوب وعطيتها أبوي ..أستغرب وقالي أن الحبوب ذي مهيب مثل اللي ياخذ دايم ..أقنعته بأن الحبوب ذي نوعيه جديده اذا أكلتها تحس أنك مثل الفحل اللي باعوه بمزايين أم رقيبه بـ23 مليون

بعد ماسويتها بأبوي وعطيته حبوب اسهال وخليته يعتكف بالحمام ذيك الليله..جلدني أبوي بعدها بالحوش لين عضيت الارض ..حقدت أكثر وأكثر ..وزاد حقدي يوم سمعت زوجة أبوي تقوله وحنا جالسين على الغدا (أحبك يا بو صنت لو مافيك عرقن ينبض)..قررت اني أجتمع بالدلوخ أخواني ونشوف لنا حل ..
شليويح: خلاص لازم نشوف لنا حل ..ترا أبوي كل مالها ويسحب علينا ويطير بالعجه مع مرته ..تصدقون أني أمس اقوله ابي ميتين قطة الاستراحه قالي رح استأذن من خالتك حنان
أنا: تصدق حتى أنا أبوي أول اذا شافني اصلي الفجر دهن سيري بميه ..اللحين هو ماعاد صار يصلي الفجر خلقه
عمشه: صنت عطني زجاره
أنا: افا ..وشو له
عمشه: عشان أمخمخ على الخطه وأتكتك لها
شليويح: أخص ياجريتستكتكين أجل..المهم نبي الاسيويه لا أوصيك
عمشه: بلا أستهبال ..ترا لقيت الحل
أنا : وشو بسررعه
عمشه: سكرييين ..فلم سكرييين
شليويح: سكرييين !! قصدك سكريم يالدلخه
عمشه: ايه ايه ..نجيب قناع ونخوف مرت أبوي ..عاد هي ايقالي رقيقه وما امشي وانا حفيانه ..نبي نطير عقلها وننحشها من البيت..

أتفقنا عمشه تلبس قناع وتدخل على مرة أبوي ..طبعن ذاك اليوم كان أبوي نايم عند أمي ..ايقاله بيعدل هو ووجه ..راحت عمشه الساعه 2 وانا وشليويح ننراقب الوضع ..دخلت عمشه على مرت أبوي ..قعدنا نسمع صراخ وصوت تفال ..وأخر شي سمعنا صوت حنان زوجة أبوي تقرا قرأن ..
قلت لشليويح: أقول وين عمشه تأخرت وما عاد لها حس ..لاتكون ماتت وذي تقرا الفاتحه عليها
شليويح : أزين ليتها تذبحها عشان يقصونها ونرتاح
انا: يازلابه مشينا ندخل عليهم ونشوف وش صار
دخلنا الغرفه ولقينا عمشه طايحه وتهتز ومرت أبوي تقرا عليها ..استغربنا وش سالفة عمشه وش مطيحها ..أكتشفنا بعدين أن عمشه ساكنها جني وهو سبب عنوستها ..يوم صار الموقف وسمع الجني صوت مرت أبوي وهي تقرا قرآن ..أغمى على عمشه وطاحت وخربت الخطه..
أخذت عمشه وطلعنا من الغرفه نجر أذيال الهزيمه ..ونحس بأحساس لاعبين المنتخب يوم يسجل فيهم يونس محمود لاعب االعراق ويخسرون نهائي كاس اسيا 2007..
بعد مانكبتنا عمشه وكبت العشا ..أبوي حقد علينا وعرف اننا محنا مخلين حرمته بحاله طول ماهي عندنا بالبيت ..عشان كذا اتخذ قرار ينص على ان باب البيت بعد الساعه 12 يقفل ..وانا وشليويح ننام بالملحق برا ومانعتب عتبة الباب..كان للقرار أثره الرجعي علينا ..وزاد حقدنا أكثر وأكثر على مرت أبوي ..

أنا: ايييه ياشليويح وانا أخوك ..هذي اخرتها ننام انا وانت بالملحق كننا سواقين ..بس شنقول كله من وجه النكبه زوجت أبوي
شليويح: لو توك مابعد شفت شي ..خلها لين تولد وشف وشلون بيسحب علينا أبوي
أنا متفاجأ: زوجة أبوي حامل !!! من مين!!
شليويح: من بطنها حامل شلون من مين ..من أبوك يالاثول
أنا: لا لا عجزت أصدق أن ابوي زوجها ..ياخي مهم لايقين على بعض ..كنهم خلاقين أحلام يوم تطلع بأخر من يعلم..
شليويح: لقيتها يا بو شنب ..لقيت الحل اللي بيخلي أبوي يطلق مرته وهو مغمض
أنا: لا ياخوي ..مالها داعي تخلي أبوي أعمى ..خل نخسر الجنين ولا نخسر عيون أبوي
شليويح: يازلابه اقصد عندي سالفه بتخلي أبوي يطلق مرته على طووول ..
أنا متحمس: وشي قب تكفى ..
شليويح: واحد من الشباب عندنا مسمينه(براد بيت) من قوة الطخامه اللي فيه
قاطعة شليويح: براد بيت ولا زمزمية شاهي
شليويح : أقول بلا استهبال يا ظلال الزراق.. أقولك هذا واحدن أطخم من خوينا يالاستراحه ..عليه أسلوب ابن كلب كنه سعود الفيصل يخليك تجي على وجهك من قوة الاسلوب والسياسه اللي فيه..
أنا مستغرب : طيب وش دخل خويك بمرت أبوي !!
شليويح: أعطيه رقم زوجة أبوي أخليها يكلمها ..وعقبها عاد نعلم أبوي وننكبها
أنا: ياخي استح ..ولا تدري خلاص لاتستح..والله أنها تستاهل هاللي كنها فلبينيه

راح شليويح الاستراحه وعطا خويه الرقم ..ودقوا عليها ..ماترد..دقو مره ثانيه وردت ..بدا يتكلم معها وشليويح جالس يسمع ..بس ماش ماعطته وجه ..مع أن اسلوبه يخقق ..لدرجة ان شليويح خق وهو ماله شغل ...المهم قفلت الخط بوجهه ورجع دق مره ثانيه ..أبوي الذهين كان جالس جنبها وقالها سايره بنشوف وش اخرتها معه..قعدت تساير الرجال وتاخذ وتعطي معه ..فجأه صرخ شليويح وقال : بنت الكلب اثره طلعة راعية سوابق
هنا أبوي سمع صوت شليويح وعرف أنه هو اللي قايل للرجال يكلم حرمته ..

زعل أبوي من شليويح .انهى عقده ..وطرده من البيت مثل ما طردني بالموضوع الاول ..تذكرون
مرت الايام ..وبيتنا منعفس فوق تحت ..عمشه وزوجة أبوي طقاق العصر ..أمي اضربت وصارت ماتصلح الغدا وجبنا شغاله بس مرت أبوي طردتها لانها تغار على أبوي ..شليويح رجع للبيت بعد ما واقفت مرت أبوي وتوسطت يرجعه بشرط أنه يوديها للسوق كل ما بغت..
جا موعد ولادة مرت أبوي ..دق علي أبوي وقال: صنت وأنا أبوك جب أخوانك وتعال لنا بمتشفى المملكه خالتك حنان ولدت وجابت ولد
أنا: بمستشفى المملكه مره وحده وحنا يايبه اللي مولود بمطبخ جدتي واللي مولد بشعيب بالصمان ..وذي موديها لمستشفى المملكه
أبوي: يالاثول لايكثر هرجك وتعال بسرعه ..

قبل لانطلع من البيت جمعتنا امي ..وقالت يا عيالي تراني منيب راضيه عن كل اللي سويتوه ..ترا مهما صار هذي زوجة أبوكم ..ومن لحمكم ودمكم.. والظفر عمره ما يطلع من اللحم ..والولد اللي جابته تراه عضيدكم ويشيل اسم ابوكم ..اعقلو وصيرو رجال ..لاتخلون العالم تضحك عليكم ..وانتي ياعمشه خوذي هذي حلبه وسويدا وقرصان عطيها مرت أبوك ..أكيد أنها اللحين تعبانه ياعزتي عنها..

وصلنا المستشفى وسلمنا على مرت أبوي ..وقلنا حنا اسفين على كل اللي سويناه..هي تعاطفت معنا وقالت أصلن انا نسيت ..حبيت راسها وحسيت اني خقيت ..بعدين انتبهت انها مرت أبوي وأن اللي جنبها أخوي الجديد..قعدنا بعدها نسولف ونضحك وأبوي مستاسعن صدره مدري عشانا صرنا نحب مرته ولا عشان جايه ولد من هالطخمه
شليويح: الا صح وش ناوين تسمون الولد
عمشه: اكيد مثل اساميكم حول صنت ولا شليويح
مرت ابوي : لا بنسميه ياسر
أنا: وشرايك ويلي أحسن تراه دايم يحسم مباريات الهلال وشو ياسره اللحين أنا شليويح وأخوي صنت وذا اسمه ياسر ماتجي
أبوي: أقول انثبر مالك شغل لا أتفل في وجهك
أنا: خلاص خلاص ..ياسر ياسر ..بس أهم شي بدون استراحه
عم جو من الضحك علينا ..ورجعت البسمه على شفاتنا ..وتذركنا كلمة أمي يوم تقول(الظفر ما يطلع من اللحم)

الحمدلله ع السلامه خلاصتو ردو الله لايهينكم

---

hld ,hgw]hli hgu'htdiP