شوفو مصيبتها يمكن تهون مصايبكم :"(

فيه اخت طلبت اني اكمل قصتها مع ولد عمة امها ....

بقولها لكم من البدايه بكل التفاصيل .,,

في ليلة العيد كنا في بيت جدتي (ام امي) وكنت بالشارع على اساس خالي اللي في امريكا بيجي
وعمري ماشفته بحياتي فرحانه اني بشوفه

كنت في اولى ابتدائي وجالسه بالشارع مع عيال خوالي المهم
راحو العيال للبقاله وانا مارحت بس لحقتهم شوي اقولهم يجيبون لي معهم

المهم هم راحو ومابقى الا انا بالشارع شوي الا جت سياره سودا وفيها واحد وقف قريب من البيت عند بيت جيراننا

فتح الباب وقال لي تعالي ... تعالي انا خالك (فلان) .. تعالي سلمي علي ..

انا مااعرفه بس توقعته هو خالي اللي يقولون انه بيجي من امريكا في هذا اليوم

المهم رحت عنده وسلمت عليه وكان سلامه حاااار
قال تبين تروحين البقاله تبي عصير وحلاو قلت ايه

قال تعالي اوديك شالني وركبني بجمبه بهذا الوقت بنت جيراننا فتحت بابهم وشافتني واستغربت هي كانت اكبر مني بكثير

المهم

رحنا للبقاله اللي قريبه وكنت ساكته بس خايفه شوي قال الحين اجيبلك حلاو وعصير ونزل للبقاله

رجع وجاب معه (كريم) وقال هذا الدكتور قال لازم تحطينه هنا عشان اطيب <<<< يأشر على العضو

انا بديت ابكي لاحظوا للحين احنا قدام البقاله بالسياره ولما بكيت قال اسكتي والا بقطع لسانك بالسكين يقول هنا السكين بالدرج اقطع لسانك سكت من الخوف واناظر البقاله الا ولد خالي طالع منها ومعه كيس حلوياتنا وكنت ارتجف من الخوف من الحقير اللي معي

شغل السياره ومشى ووداني على الحاره اللي ورانا

حسبي الله ونعم الوكيل فيه

وقف عند بيت مهجور لكن هالبيت قريب من الشارع العام
بس ايام اول كانو الناس في بيوتهم بالعيد مافيه زي الحين
كانت الحاره هاديه ومافيه سيارات تروح وتجي

المهم فتح الباب ونزل رجله
وشالني وحطني بحضنه ..... وبدأ بعدها نزلني على الرصيف وهو بالسياره جالس وفك سحاب فستاني ونزله على الارض وبدأ يشيل ملابسي وكنت ارتجف وابكي بصوت منخفض خايفه منه يذبحني على كلامه ( فيه تفاصيل مااحب اتذكرها مابي اتكلم عنها )

لكن صار شي زي الرحمه من عند الله

كان بالشارع اللي مقابل فيه بيت لشيخ معروف مابي اقول اسمه
كان في هذاك الوقت الشيخ اللي مثله يحطون عند بيته حرس

المهم انتبه حارس البيت للي جالس يصير وجا يركض انا فهاللحظه قلت يمه .. شرطي

قام الحقير للي مايخاف الله رماني على الرصيف وسكر الباب وانحاش

تخيلو

الله اكبر عليه وعلى اللي مثله

تصورو توه الحارس ماوصل قمت شلت فستاني من على الارض ورحت اركض وهو يلحقني وقسم بالله ان الحاره ظلام وكنت اركض خايفه منه يسوي فيني شي مثل هذاك

ولأني كنت دائما بالشارع وصبيه على قولة امي .. كنت ادل بيت جدتي

المهم كان يلحقني الحارس يقول تعالي بوديك عند اهلك بس انا ماوقفت دخلت في ارض فاضيه كانت مظلمه طبعا كنت حافظتها دايم نلعب فيها
لبست الفستان وماعرفت اسكر السحاب قمت كملت ركض ووصلت بيت جدتي

لما دخلت لقيت الناس والزحمه وبنات خوالي وخالاتي يناظرون فيني وعلى طول فهمو
شالتني امي وهي متفشله مني ودخلتني الحمام وفتحت المويه علي

ولا قالت ولا كلمه بس تتأفف

مادرت باللي فيني مادرت وش كثر احتجت لحضنها واحتجت تسمّي علي
الدموع بعيوني مانزلو ابد بقت بعيوني مابكيت وسكت لين كبرت وانا ساكته ماقلت لمخلوق باللي صار
حتى ابوي حبيبي ماحكيتله اللي صار كان دايم بالليل ياخذني معه يقول اللي اخذك كيف شكل سيارته ؟

مثل هذي ؟ والا مثل هذي ؟
وانا ماارد عليه

تدرون لما صرت بالثانويه وش صار؟
دق الجرس بيوم من الايام وراح ابوي يفتح كان رجال نعرفه دخله ابوي قمت انا من اللقافه رحت وطليت بكل برائه بس بشوف مين اللي جانا

لما شفته انصدمة ووجعني قلبي

بعد ربع ساعه دخل ابوي يقول لأمي تخيلي وش جاي يبي ...

جاي يخطب بنتي !

تصورو هو نفسه النذل اللي خطفني هو نفسه ولد عمة امي لاااااا والمصيبه جاي يخطب اختي

نسى اللي سواه فيني!

بس ابوي رفض طبعا لأنه سكير وسمعته مو حلوه



اللي آلمني اكثر من هذا كله

لما كبرت وصرت احس باللي حولي من قرايب وخالي القذر وعيال جيراننا يتحرشون فيني مو حب والا اعجاب لاااا بس لأنهم عارفين عني اني مو بنت

حسبي الله ونعم الوكيل
كنت لما يتحرش فيني احد مااعطيه مجال بس بقلبي ادعي عليه
والحمدلله دايم دعوتي تصيب فيهم لأنهم ظالمين


ياناس انتبهو على بناتكم وعلى عيالكم والله هالشي يصير بلحظة غفله
تندمون من بعدها طول العمر

هذا غير العذاب النفسي والمعاناة اللي احس فيها تعبت كثير حتى مع اني تزوجت الحمدلله
بس لما يجيني زوجي تجيني غصه اكرهه واعشقه بنفس الوقت ابيه وماابيه بنفس الوقت
شعور غريب
كرهت حياتي معه احيان احس اني مااستاهل احس اني رخيصه ومااستحق اعيش
واحيان احس اني استحق كل شي حلو بالدنيا لأني انظلمت وصبرت
صبرت على كلام الناس عني صبرت على غدر الناس فيني
شفت بالدنيا بلاوي وربي
بس اني ببقى صابره لين اموت واثقه ان الله بيرحمني وبيسعدني بيوم من الايام وبيعوظني عن اللي شفته

الحمدلله الحمدلله الحمدلله

---

a,t, lwdfjih dl;k ji,k lwhdf;l :"(

حسبي الله عليه ...........

يعطيك العافيه ***

الدنيا دار بلاء وامتحان دامها تخاف الله ماعليها من حكي الناس...

ياوييييل قلبي وقسسم نزلت دموووعي ..
حسبي الله ونعم الوكيل..

حسبي الله عليه وربي بيفضحه انشا الله
ودامها تزوجت خلاص تنسى وتتوكل على الله ورب العالمين مايخذل مظلوم ابد